. Pisikilti — elvaj pwason nan basen oubyen resous dlo — ap tounen yon solisyon dirab pou amelyore sekirite alimantè ak ekonomi nan zòn riral Ayiti. Nan yon peyi kote plis pase 49% popilasyon an sibi ensekirite alimantè, elvaj pwason ofri yon sous pwoteyin abòdab ak fasil pou mete sou pye.
Zòn tankou Latibonit, Sid, Sant ak Nip ap pran devan nan inisyativ sa a, kote kominote yo itilize dlo rivyè, dlo souterèn ak ti rezèvwa pou elve tilapia, pwason-chat ak krap.
Dapre yon rapò FAO (2023), pisikilti lokal la kouvri mwens pase 5% nan demann nasyonal an pwason, pandan peyi a depanse plis pase 20 milyon dola US chak ane pou enpòte pwason. Se yon opòtinite pou ranfòse pwodiksyon nasyonal.
Estrateji ki itilize yo baze sou fòmasyon teknik kominotè, konstriksyon basen atizanal, ak mete koperativ sou pye. Agrikilti ak pisikilti ka entegre nan sistèm akwaponik, sa ki pèmèt jaden ak basen fonksyone ansanm.
Pisikilti pa sèlman mete manje sou tab, li tou kreye travay, sitou pou jèn ak fanm. Nan kèk kominote, revni an soti nan pisikilti depase 15,000 goud pa mwa pa fanmi.
Avèk bon jan sipò teknik, finansman ak sansibilizasyon, pisikilti gen kapasite pou transfòme lavi riral yo epi redui depandans Ayiti sou pwason etranje.
Henri Alphonse
Journaliste et communicateur social