Malgre sekirite a ap vin pi mal chak jou, ekip èd Nasyonzini yo kontinye ap travay ak patnè lokal ak otorite depatmantal yo pou bay resous bay sivil ki deplase yo.
“Moun ki deplase yo pèdi tout sa yo te genyen – fanmi antye ap lite pou jwenn dlo, swen sante, oubyen abri ki apwopriye.”
Biwo Kowòdinasyon Zafè Imanitè Nasyonzini (OCHA) “rete angaje bò kote otorite lokal yo ak patnè yo pou ranfòse aksyon imanitè a, malgre limit resous yo, epi kontinye plede pou plis sipò,” se sa Modibo Traoré, Chèf Biwo OCHA ann Ayiti, deklare.
Nan tout Depatman Sant la, UNICEF rive pote asistans bay 8,500 moun, ladan li gen sis (6) klinik mobil.
“Nou ap ogmante repons nou nan Depatman Sant la, kote nou bay swen sante ki esansyèl, ede plizyè milye timoun ak sipò sikososyal, dlo potab, epi aksè ak edikasyon kote bezwen an pi gwo,” dapre sa Madam Narayan fè konnen.
PAM (Pwogram Alimantè Mondyal) ap travay tou nan Depatman Sant la pou bay manje cho ak kit alimantè bay kominote ki deplase yo, epi li deja pote asistans bay plis pase 13,100 moun deplase nan zòn sa a depi kòmansman mwa me.