1 000 sòlda FAD’H pral fòme nan peyi Kolonbi

ByCentre à la UNE

Juil 21, 2025

Plizyè ajan Fòs lame DAyiti pral benefisye tou seyans fòmasyon an Kolonbi, aprè Meksik, Brezil ak Giyàn fransèz.

Se prezidan Gustavo Petro ki fè anons lan kèk èd tan aprè dezyèm vizit li an Ayiti, vandredi 18 jiyè 2025 lan. Pou moman an, pa ankò genyen okenn dat ki fikse.

Yon lòt kote, chèf Leta kolonbyen an pwofite pou remèsye nasyon ayisyèn nan ki nan pase te ede zansèt li yo pami yo jeneral Miranda ak Simón Bolivar nan batay yo pou pran endepandans. Gustavo Petro raple drapo kolonbyen an te koud pa kèk fanm nwa ak lib.

N ap raple, prezidan peyi Kolonbi a te debake an Ayiti pou yon vizit ofisyèl, vandredi 18 jiyè pase a. Dezyèm vizit Gustavo Petro a enskri l nan yon dinamik koperasyon 2 peyi yo sitou an matyè sekirite, daprè otorite tranzisyon yo. Se kowòdonatè Konsèy prezidansyèl tranzisyon an Fritz Alphonse Jean ki te akeyi chèf Leta kolonbyen an, pandan li te resevwa salitasyon pwotokolè dizaj.

Jacky Médé Fontaine, Centre à la UNE

By Centre à la UNE

Centre à la UNE se yon miltimedya sou entènèt ki te fonde 9 jiyè 2020. Li espesyalize nan bay nouvèl nan lang kreyòl, yon angajman ki reflete vizyon fondatè yo pou fè enfòmasyon pi aksesib pou kominote kreyòlofòn yo. Medya a genyen yon misyon pou enfòme, sansibilize, epi angaje moun sou sijè enpòtan nan sosyete a. Miltimedya sa a prezante atik, analiz, ak editoryal sou diferan domèn tankou dwa moun, politik, ak sosyete. Chak jou, editoryal li yo adrese pwoblèm enpòtan, souvan ak referans ak sitasyon otè ki enspire refleksyon pwofon sou kondisyon jèn Ayisyen yo ak sitiyasyon sosyo-politik Ayiti. Kòm yon medya angaje, li gen yon apwòch edikatif epi li chache ankouraje konsyans ak refleksyon nan mitan lektè li yo. Jounal sa a se tou yon espas pou kreyativite kote li prevwa pou ajoute caricatures k ap ilistre nouvèl oswa evennman k ap pase yo. Centre à la UNE se yon referans pou moun ki vle rete enfòme nan lang yo pi byen konprann. Nouvèl nou yo kredib e verifye ak yon rezo jèn jounalis profesyonèl e konpetan. Ou ka kontakte nou nan: journalcentrealaune@gmail.com e +549 351 262 7841

Non classé