Anbasad Etazini ann Ayiti anonse nan dat 14 Dawout 2025 la, otorite ameriken yo pran mezi kont yon sitwayen ameriken, Bazille Richardson, alyas Fredo, akize pou wòl li nan finansman gang teworis nan peyi Ayiti.
Daprè deklarasyon ofisyèl la, Richardson, ki abite nan Texas, ta voye fon bay chèf gang ayisyen an Jimmy Cherizier ke tout moun konnen sou non Babekiyou, sa ki konsidere tankou yon vyolasyon parapò ak sanksyon amerikèn yo ki deja anvigè sou chef teworis la.
Paralèlman otorite yo fè konnen Richardson ak Cherizier te lanse apèl nan direksyon dyaspora ayisyen an Ozetazini pou rasanble lajan pou aktivite gang yo. Lajan sila yo te pase atravè plizyè entèmedyè pou ateri an Ayiti. Daprè akizasyon yo, lajan sa te sèvi pou peye salè manm gang yo ak achte zam ak lòt zafè ilegal. Yon lòt kote anbasad la note Imaj resi transfè yo ta menm te voye dirèkteman bay Cherizier.
Etazini raple ke aksyon konsa konsidere kòm yon sipò dirèk pou aktivite teworis, e li antre nan kad lwa federal sou sanksyon entènasyonal yo. “Epòk enpinite an ann Ayiti fini”, dekalre Anbasad Etazini sou kont X li, sa ki ta souliye ak souzantann detèminasyon yo pou pouswiv moun k ap sipòte finansyèman gang vyolan yo.
Sepandan daprè ekspè nan sekirite, mezi sa yo fè pati yon estrateji pi laj pou izole finansman rezo kriminèl yo ann Ayiti, ki depi plizyè ane ap destabilize kapital la ak plizyè lòt rejyon nan peyi a.
Jefferson Bonissant Centre à la Une