Se prezidan FIFA, Gianni Infantino (italyen) ki fè anons lan. An akò avèk otorite amerikèn yo, pwogram FIFA PASS la lanse anfavè moun ki genyen nan men l yon biyè match Koupdimonn 2026 la ki dezire rantre Etazini.
<< Mwen trè ere pou anonse lansman FIFA PASS (sistèm pou pran randevou priyoritè) - yon sèvis k ap ofri a chak fanatik ki achte yon biyè pou Koupdimonn FIFA sou FIFA.com/tickets epi ki rann li Etazini posiblite pou pran yon randevou priyoritè pou viza li >>, se sa prezidan Federasyon Entènasyonal Foutbòl Amatè a deklare sou paj Instagram li.
Amerik la ap akeyi mond lan, e FIFA PASS ap reprezante yon etap majè nan preparasyon Koupdimonn FIFA a, pandan li souliye kolaborasyon sere ant FIFA ak gwoup travay Mezon Blanch lan pou òganize yon evènman mondyal veritableman nouvo, se sa li ajoute, aprè yon rankont nan biwo Oval avèk prezidan Donald Trump.
<< Nou toujou di se kapab pi gran ak pi enklizif Koupdimonn FIFA nan istwa - e FIFA PASS se yon egzanp trè konkrè. M ap adrese sensè remèsiman m a prezidan Etazini an, Donald J. Trump, a vis-prezidan J.D. Vance, a sekretè Deta ameriken an Marco Rubio, a sekretè Sekirite enteryè amerikèn nan Kristi Noem, a direktè egzekitif la Andrew Giuliani epi a gwoup travay Mezon Blanch lan pou soutyen enkwayab yo >>, se sa nou li nan piblikasyon Gianni Infantino a.
Èske Ayisyen ap kapab ale sipòte Ayiti nan Mondyal 2026 la nan peyi Etazini ?
Sipòtè ayisyen ki p at ankò genyen viza p ap ka rantre Etazini pou vin sipòte seleksyon nasyonal la nan mondyal 2026 la, pou match k ap jwe Etazini yo. Se sa administrasyon Donald Trump lan deside.
Alòske seleksyon nasyonal la kalifye pou Koupdimonn FIFA 2026 la, peyi a sou restriksyon viza Depatman Deta ameriken.
Nan jen 2025, prezidan Trump te siyen yon entèdiksyon pou vwayaje kont 12 peyi, yon etap li te dekri kòm esansyèl pou << pwoteje sekirite nasyonal ak enterè nasyonal Etazini ak pèp li >>. Pami konsène yo, nou jwenn resòtisan ayisyen yo ki se imigran ak non-imigran.
Jacky Médé Fontaine, Centre à la UNE