Jwè ayisyen yo ki pèmèt Ayiti jwenn tikè kalifikasyon li pou Mondyal FIFA 2026 la lanse yon kri bay otorite ak dirijan ayisyen yo pou louvri peyi a. Anbasadè sa yo di yo ta renmen vin fete ak pèp Ayisyen an lakay yo kalifikasyon peyi yo aprè 52 lane.
Si laprès entènasyonal salye kalifikasyon istorik Ayiti nan Mondyal 2026 la kòm yon eksplwa espòtif ak yon senbòl lespwa, Karine Jean-Pierre pa rete endiferan lè li menm tou salye pèfòmans istorik seleksyon ayisyèn nan. Ansyèn pòt-pawòl Mezon-Blanch lan, Karine Jean-Pierre reyaji aprè kalifikasyon istorik seleksyon ayisyèn foutbòl la pou Koupdimonn 2026 la, pandan li salye yon << moman eksepsyonèl >> pou peyi a ak pou diaspora.
Sou plan nasyonal, laprès, otorite ak dirijan nan tout sektè ak nan tout nivo nan peyi a, òganizasyon tout sòt ak tout kalte nan sosyete sivil la, pwofesyonèl, chomè, etidyan, senp sitwayen… salye kalifikasyon istorik Ayiti pou Mondyal 2026 la. Se lajwa, kontantman, efori… bò kote ayisyen tout kote sou latè! Ayiti pral patisipe nan Koupdimonn 52 lane aprè dènye patisipasyon l : yon rèv ki devni reyalite.
*Èske se nan televizyon ayisyen ki an Ayiti pral gade Ayiti k ap jwe nan Mondyal la ?*
Administrasyon Donald Trump lan konfime sipòtè Ayiti yo pa otorize pou asiste Mondyal la – Ayisyen yo an Ayiti pa pral kapab rann yo Etazini pou sipòte ekip yo nan Koupdimonn FIFA 2026 la.
Nouvèl la genyen efè yon bonm ! Ayiti fè pati 12 peyi ki p ap genyen aksè ak FIFA PASS peyi Etazini ap bay la. Sipòtè ayisyen ki p at deja genyen viza ameriken p ap jwenn viza pou ale gade match Ayiti nan Koupdimonn FIFA 2026 la malgre peyi Etazini pral mete sou pye yon selil ki pral travay pou bay sipòtè peyi ki ap vini nan mondyal la viza. Pwogram sila batize »FIFA PASS ». Ayisyen p ap jwenn aksè sila paske Ayiti fè pati 12 peyi administrasyon Trump la entèdi pou resòtisan yo rantre sou tèritwa ameriken an atravè yon dekrè li te siyen nan mwa jen pase a.
Kite nou raple, desizyon Depatman Deta ki entèdi resòtisan 12 peyi pami yo Ayiti rantre Etazini rantre an aplikasyon 9 jen 2025 pase a. Otorite amerikèn yo fè konnen restriksyon sa vize pwoteje Etazini kont teworis etranje ak lòt menas ki lye avèk sekirite nasyonal ak site piblik. Sispansyon sa konsène tout kategori viza non-imigran ak migran, eksepsyon fèt pou viza diplomatik ak ofisyèl, viza imigran pou paran imedya sitwayen ameriken, pwosedi adopsyon pa sitwayen ameriken, viza imigran espesyal ki destine avèk anplwaye gouvènman ameriken, elt.
#OuvèPeyi-a se yon kri konsyans, lespwa ak rezilyans ! Se yon paradòks, yon peyi tankou Ayiti san chanpyona pwofesyonèl, san bon jan kalite tèren, san pwogram devlopman foutbòl, san politik espòtif.. li rive kalifye pou yon faz final Koupdimonn ; ou pa ta di se yon kalifikasyon ki sòti nan egzil. Jiskilè Leta ayisyen ap fè de foutbòl la yon politik piblik inite nasyonal ?
Jacky Médé Fontaine, Centre à la UNE