Konseye-Prezidan Emmanuel VERTILAIRE, ansanm ak Anbasadè Taywan ann Ayiti, Hu Cheng Hao, te fè yon vizit ofisyèl nan Grand Nò a nan okazyon fèt patwonal komin La Victoire, 22 novanm 2025. Selon biwo kominikasyon laprezidans, demach sa a rantre nan kad ranfòsman relasyon koperasyon ak amitye ant Ayiti ak Taywan.
Anbasad Taiwan nan peyi Dayiti remèt yon chèk 200 000 dola ameriken bay Majistra Kap-Ayisyen an, Angie Bell.
Kantite lajan sa, ki soti nan kolaborasyon ant Taiwan ak otorite lokal yo, pral sèvi pou finansman divès pwojè enpòtan nan dezyèm vil peyi a tankou : amelyorasyon enfrastrikti, asenisman, ekleraj piblik, jesyon fatra, epi ranfòsman sèvis minisipal yo.
Objektif la se pousuiv efò yo pou ranfòse gouvènans lokal la epi ankouraje yon devlopman dirab ki nan benefis popilasyon an
Apre li te asiste mès solanèl an onè Sante Sèsil, li te fè yon toune ki te santre sou sekirite, devlopman lokal ak amelyorasyon enfrastrikti piblik yo. Li te vizite komisarya La Victoire, epi li te pase nan Meri a kote li te pale ak otorite lokal yo, espesyalman sou bezwen dlo potab.
Pandan vizit la, Konseye-Prezidan Emmanuel Vertilaire te anonse ke komin nan pral byento tounen yon gwo chantye devlopman. Kat pwojè ki deja jwenn finansman pral lanse :
Konstriksyon yon konplèks administratif modèn
Konstriksyon yon mache piblik
Amelyorasyon ak amenajman plas piblik la
Betonaj lari yo
Twa lòt pwojè ap etidye, tankou konstriksyon wout estratejik yo ak konstriksyon nouvo Lekòl Nasyonal La Victoire. Gen tou demach k ap fèt bò kote FNE pou reyabilitasyon lekòl yo.
Gras ak inisyativ Konseye-Prezidan an, 150 101 100 milyon goud te mobilize pou premye travay yo, sa ki make yon nouvo faz modènizasyon pou komin nan.