Sekretè jeneral Òganizasyon Eta Ameriken yo (OEA), Albert Ramdin, te vizite Ayiti semèn sa a. Pandan vizit la, li rekonèt sitiyasyon peyi a trè grav, sitou akòz vyolans gang yo ak enstabilite politik ki dire depi plizyè ane.
Nan plizyè zòn, gwoup kriminèl yo ap simen laterè : asasina, vyòl, piyaj ak kidnaping vin tounen yon reyalite chak jou, nan peyi Karayib sa a ki deja pi pòv nan tout kontinan ameriken an.
Ayiti pa òganize eleksyon depi nèf (9) ane. Jodi a, se otorite tranzisyon k ap dirije peyi a. Yo fèk anonse plan pou òganize eleksyon lejislatif ak prezidansyèl nan ete 2026.
Albert Ramdin fè konnen li pa t kapab deplase toupatou pandan vizit li a, men li ensiste sou yon pwen enpòtan :
> “Lefèt ke mwen te kapab rive Pòtoprens montre gouvènman an toujou egziste e li toujou ap dirije peyi a.”
Yon deplwaman pa etap
Dapre chèf OEA a, nouvo fòs sekirite a ap deplwaye piti piti. Si tout bagay mache byen, anviwon 1 000 ajan sekirite ta dwe kite peyi yo nan mwa janvye pou vini Ayiti.
Anvan 1ye avril 2025, mwatye nan kontenjan an ta dwe deja sou tè ayisyen an, menm dat kote yon biwo Nasyonzini gen pou l louvri ofisyèlman.
Plizyè peyi afriken pral jwe yon wòl kle nan misyon an, ansanm ak Sri Lanka ak Bangladèch. Gen kèk peyi nan Amerik Latin ki deja eksprime volonte yo pou kontribye tou.
Antretan, Kenya deja voye anviwon 100 polisye anplis Ayiti, lendi pase a, nan kad misyon entènasyonal kont gang yo. Men, jiskaprezan, rezilta misyon sa a rete limite.
Yon fòs 5 500 sòlda ak sipò 18 peyi
Albert Ramdin konfime nouvo fòs sekirite a pral gen 5 500 sòlda, jan sa prevwa nan plan estratejik la ki fèt anba direksyon Etazini.
Vandredi, li anonse tou ke 18 peyi deja angaje yo pou voye fòs sekirite Ayiti, nan kad yon nouvo operasyon anti-gang ki gen pou ranplase misyon miltinasyonal aktyèl la.
“Pi gwo defi a,” dapre li, “se fè tout peyi sa yo travay ansanm, ak menm règ ak menm pwosedi. Se sa ki fè pwosesis pou mete fòs sa a sou pye a pran anpil tan.”