Depite Berny Jacques, ki reprezante 59 èm Distrik Florid la anba pati Repibliken, depoze yon pwojè lwa ki rele HB 1307, jou ki te 8 janvye 2026 la. Pwojè lwa sa a vize sere boulon sou migran san papye k ap viv nan Florid.
Selon dokiman an, si lwa a pase, migran san papye pap gen dwa louvri kont labank, voye lajan aletranje, resevwa èd pou achte kay, ni menm touche lajan si yo fè aksidan nan travay. Lwa a prevwa tou pinisyon sevè kont tout antrepriz ki bay migran san papye travay.
Yon konpayi ki anplwaye migran san papye volontèman ka wè lisans komèsyal li sispann pou 1 a 5 lane, e menm retire nèt. Amann yo kapab rive ant 10 mil ak 250 mil dola pou chak vyolasyon. Si yon antrepriz anplwaye jiska 50 migran san papye, li ka fè fas ak akizasyon kriminèl twazyèm degre.
Depite Berny Jacques, ki fèt an Ayiti, di li prezante pwojè lwa sa a pou eliminen tout politik ki ankouraje imigrasyon ilegal nan Florid. Pwojè lwa a deja ap pwovoke anpil deba, sitou nan kominote imigran yo.
Florid : Yon depite ayisyano-Ameriken depoze pwojè lwa kont migran san papye
ByCentre à la UNE
Jan 10, 2026
By Centre à la UNE
Centre à la UNE se yon miltimedya sou entènèt ki te fonde 9 jiyè 2020. Li espesyalize nan bay nouvèl nan lang kreyòl, yon angajman ki reflete vizyon fondatè yo pou fè enfòmasyon pi aksesib pou kominote kreyòlofòn yo. Medya a genyen yon misyon pou enfòme, sansibilize, epi angaje moun sou sijè enpòtan nan sosyete a. Miltimedya sa a prezante atik, analiz, ak editoryal sou diferan domèn tankou dwa moun, politik, ak sosyete. Chak jou, editoryal li yo adrese pwoblèm enpòtan, souvan ak referans ak sitasyon otè ki enspire refleksyon pwofon sou kondisyon jèn Ayisyen yo ak sitiyasyon sosyo-politik Ayiti. Kòm yon medya angaje, li gen yon apwòch edikatif epi li chache ankouraje konsyans ak refleksyon nan mitan lektè li yo. Jounal sa a se tou yon espas pou kreyativite kote li prevwa pou ajoute caricatures k ap ilistre nouvèl oswa evennman k ap pase yo. Centre à la UNE se yon referans pou moun ki vle rete enfòme nan lang yo pi byen konprann. Nouvèl nou yo kredib e verifye ak yon rezo jèn jounalis profesyonèl e konpetan. Ou ka kontakte nou nan: journalcentrealaune@gmail.com e +549 351 262 7841