Premye jou kanaval la, ki te òganize yè dimanch 15 fevriye 2026, mete anfas de reyalite diferan nan kapital ayisyèn nan. Pandan Petyonvil ak anwo Delma t ap viv nan anbyans fèt ak defile mizikal devan yon gwo foul moun, an menm tan te gen gwo tansyon ak eklatman ak zam nan zòn Kafou Fèy.
Daprè enfòmasyon yo ranmase, echanj kout zam te pete ant brigadye ak bandi ki lou ame nan zòn Mache Tinèl la, pa twò lwen Lise Nasyonal Kafou Fèy. Sitiyasyon an te vin pi grav apre yo fin asasinen yon brigadye yo te konnen sou tinon “Dany”. Yo rapòte li te tonbe anba bal nan perimèt Mache Tinèl la, sa ki te pwovoke yon ripòs ame ki dire plizyè èdtan.
Temwen yo fè konnen yo te tande rafal bal san rete nan katye a, sa ki lakoz anpil panik nan mitan popilasyon an. Plizyè abitan kouri kite kay yo pou chèche refij, pandan gen lòt ki poko rive retounen lakay yo akoz laperèz ak ensèten ki kontinye ap plane sou zòn nan.
Pandan tan sa a, nan lòt pati nan rejyon metwopolitèn nan, espesyalman Petyonvil ak anwo Delma, aktivite kanaval yo te kontinye anba gwo siveyans lapolis ki te ranfòse pou garanti sekirite patisipan yo.
Premye jou fèt nasyonal la konsa montre yon kapital ki divize ant kè kontan ak enkyetid, pandan kestyon sekirite a rete yon gwo defi pou otorite yo.