Minis Defans lan, Mario Andrésol, fè yon vizit enpòtan jedi 26 mas 2026 la nan baz Vètyè Fòs Ame d Ayiti (FAD’H) ki chita nan Tabarre, nan lide pou evalye nivo preparasyon twoup yo anvan yo vin totalman operasyonèl.
Pandan vizit sa a, minis la anonse pwogram pou mete an aplikasyon yon nouvo doktrin militè ki vize bay plis estrikti ak efikasite nan aksyon FAD’H yo. Daprè li, nouvo oryantasyon sa a ap pèmèt fòs ame yo pi byen òganize entèvansyon yo nan kontèks sekirite ki difisil peyi a ap travèse.
Nan menm dinamik la, pwomosyon “François Makandal”, ki sou pwen sòti, pral konstitiye premye inite atak la. Inite sa a gen pou misyon patisipe dirèkteman nan operasyon ofansif kont gwoup ame k ap simen latwoublay nan plizyè zòn nan peyi a.
Minis Mario Andrésol fè konnen tou li ap travay pou elaji wòl FAD’H yo sou teren konba a, espesyalman nan yon moman kote kriz sekirite a kontinye ap vin pi grav.
Anplis de sa, li prevwa fòmasyon anviwon 1 200 nouvo sòlda nan twa (3) mwa kap vini yo. Fòmasyon sa yo ap fèt nan baz Vètyè ak nan baz Anakaona ki nan Leyogàn. Objektif la se ranfòse kapasite operasyonèl lame a epi ogmante prezans li sou teren an.
Demach sa a antre nan yon estrateji global ki vize bay FAD’H yo plis mwayen pou yo ka reponn ak defi sekirite peyi a ap fè fas jounen jodi a.