Asosiyasyon Nasyonal Nòmalyen Endepandan Ayiti fikse pozisyon yo sou grèv Anseyan yo nan lekòl piblik yo e tou pwofite bay bilan 7 semèn grèv la.
Asosiyasyon Nasyonal Nòmalyen Endepandan Ayiti (ANNIH), prezante yon konferans pou laprès pou kontinye fikse pozisyon sou grèv Anseyan nan lekòl piblik ak Nasyonal yo nan Otèl Oasis nan komin Laskawobas jodi Dimanch 04 Jen 2023 a. Kote yo konstate malgre grèv la sou setyèm semèn minis Edikasyon Nasyonal la Nesmy Manigat refize tande revandikasyon Anseyan yo.
Pou responsab ANNIH Sant yo ki tap bay bilan 7 semèn grèv la sekretè jeneral la wilson Antonio selon li, ANNIH pa nan yon grèv pou sèlman revandike bon kondisyon travay pou Anseyan men tou pou yon lòt sistèm edikasyon ki akonpaye ak espas aprantisaj apwopriye, aksè ak Nouriti, bibliyotèk, laboratwa elatriye.
Pou Makenson Locan, kòwòdonatè depatmantal sant lan, se iresponsablite Leta ki fè grèv la rive tout 7 semèn pandan setan, minis Manigat pa janm manifeste okenn volonte pou jwenn yon antant ak Anseyan yo. Alòske konsekans lan ap peze lou sou do elèv yo. Ratrapaj, kou siplemantè ak pwolonjman egzamen an se mwayen pou elèv yo ratrape jou pèdi yo selon Makenson Locan.
Kòwòdonatè a kontinye pou di, kaye revandikasyon an paske Minis Nesmy refize ajiste salè pwofesè yo, refize bay kat debi a, refize nome pwofesè ki nan klas depi digdantan yo. Li avanse pou di se yon mechanste lè minis lan prè pou double bidjè li ak ogmante Anseyan nan lide pou li fè ratrapaj lekòl yo alòske, minis lan pagen bidjè pou ajiste salè ak bay kat debi ak anseyan nan klas yo.
Yon lòt kote, pou sèten pwofesè, grèv la dwe entansifye nan lekòl prive yo pou Leta tande rezon alòske yon lòt gwoup kwè enterè Anseyan lekol prive yo pa Komen. Se ta pito lekol sibvansyone yo. Pandan ANNIH kwè grèv la dwe kontinye.
Washington FLORVIL, Centre a la Une