Nan vil Mibalè, polisye UTAG arete plizyè moun pami yo Norelus Jean Michel alyas Dunel ki gen 33 lane. Arestasyon yo fèt lendi 22 jiyè 2024 la. Lapolis anonse yo repwoche Dunel kòm moun ki ta nan konivans ak gang Wawa, Patoutou ak Bertin ki opere Fon Djab zòn Tè Wouj ak Fon Cheval. N ap note, Dunel deklare bay lapolis tout sa l ap fè yo se anba lòd yon gwo chèf nan depatman an lapolis pa deside site non. Toujou selon lapolis, Dunel se youn nan moun ki « enfiltre » gwoup rezistans k ap lite kont gang nan Mibalè ak rès depatman Sant lan.
Dunel se yon jenn mekanisyen ki te abite Santo 25 nan kwadèboukè, nan peryòd konfli ame yo t ap monte anbil nan kwadèboukè li te kite Santo pou li te vin tabli kò li nan yon lokalite ki rele Mèy nan Mibalè kote li te vin mete garaj.
Nan moman bandi Kanaran yo te atake vil Mibalè kote popilasyon an t ap defann tèt li kont bandi ebyen Dunel li menm se youn nan moun ki te nan mouvman sa yo tou pou kwape bandi pou evite bandi vin tabli baz yo nan Mibalè.