Nan tèt kole ak delegasyon Sant lan, Lapolis fè yon pèkizisyon nan komin Beladè dimanch 30 mas 2025 la kay Schiler LOUIS yo akize de gwo trafikan zam. Divès inite nan Polis la tankou (SWAT, UDMO, BOID, UTAG) ak Jij de pè jwenn 2 zam ki gen kalib douz ak plizyè telefòn lakay Schiler ki gentan chape poul li.
Responsab yo arete Micheline LIBERICE ki se nyès Schiler, yon lòt jèn fi ak yon jenn gason nan kad ankèt y ap mennen sou dosye sa a.
Selon enfòmasyon Centre à la UNE dispoze, otorite yo fouye 4 kay, kote 3 ladan yo se pwopriyete Schiler, yo sezi pou pi piti 3 machin: Yon Nisan Fwontyè, yon Toyota fòwènè ak yon Djip Wanglè. Yo desann Mibalè ak yon pitit gason li, yon minè 14 lane ki ta yon pitit li fè ak yon dam ki nan prizon an Repiblik Dominikèn, toujou pou trafik zam ak minisyon.
N ap raple, avan Schiler, Guitho Sénat ki se mèt otèl Le Wozo nan komin Beladè lapolis te arete nan vil Ench, depatman Sant jedi 13 mas 2025 la pou enplikasyon prezime li nan trafik zam. Yon kagezon zam Repiblik Dominikèn te sezi menm jou a te pou Guitho, selon enfòmasyon nou te dispoze.
Pi lwen, nan tèt kole ak Pakè Mibalè ak tout delegasyon Sant lan, Lapolis te rive arete Crilex PIERRE ak 2 zam plis katouch. Crilex ki se moun Kachiman komin Beladè ki gen 36 lane, prezante bay otorite yo yon badj BSAP ak grad enspektè. Arestasyon an fèt nan yon klèb vandredi 7 mas 2025 la vè 11 nan aswè.
Sérondier LOUISIA, Joseph Samuel GUILLAUME, Centre à la UNE