LIB TRIBIN
Fortuné Gérald, Etidyan nan Management Business
Deplase nan komin Saut-d’Eau
Telefòn : (509) 3690-6478
Pou : Responsab Nasyonzini an Ayiti
Mesye/Madmam Responsab,
M ap ekri nou ak tout respè ki dwe fonksyon nou, men tou ak anpil doulè ak kòlè pou sitiyasyon dramatik peyi m nan ap viv.
Depi plizyè deseni, Òganizasyon Nasyonzini an, atravè plizyè misyon tankou MINUSTAH, MINUJUSTH, BINUH, epi jodi a CPT (Konsèy Prezidansyèl Tranzisyon), ap opere ann Ayiti. Sepandan, rezilta yo dezolasyon :
Ensekirite ap ogmante chak jou, gang ap miltipliye devan je reprezantan nou yo.
Institisyon peyi a fin fèb, yo souvan sèvi ak yo kòm zouti pou enterè etranje.
Ekonomi an kraze nèt, jèn tankou mwen pa gen lòt opòtinite pase egzil, vyolans, oswa dezespwa.
Souvrennte peyi a vyole, tout gwo desizyon sou lavni peyi a pran aletranje san pèp la pa janm konsilte.
Misyon “estabilizasyon” nou yo, ki te sipoze ede Ayiti rebati tèt li, olye de sa, mete l pi fon nan labou, kreye plis depandans, plis dezòd, plis mizè. Pi gwo egzanp echèk sa se kolera ke Kask Ble yo te mete nan peyi a an 2010, ki touye plizyè milye moun. Jiska jodi a, eskiz pa ranplase jistis ni reparasyon.
Jodi a, m ap di nou sa klè : nou menm, Nasyonzini, nou tounen youn nan vrè pwoblèm Ayiti. Prezans nou an soutni yon sistèm dominasyon kache ki bloke tout solisyon vre ke Ayisyen ka mete sou pye. Nou bezwen konpayon, pa dominatè. Nou bezwen solidarite, pa kontwòl.
M rele Fortuné Gérald, jèn etidyan ki fòse kite komin Saut-d’Eau akoz laterè. Men, mwen se sitwayen ki leve kanpe, ki konnen sa l vle. Nan non plizyè milye jèn ayisyen ki toujou kwè nan leve kanpe Ayiti, m ap mande nou ak tout fòs : retire men nou sou desten pèp sa a.
Kite pèp ayisyen pran desten li nan men li. Sispann mete tèt nou kòm sèl deside. Ann koute vwa pèp la. Ayiti pa yon laboratwa pou eksperyans entènasyonal. Ayiti se yon nasyon souverèn ki merite renesans li.
Avèk respè, men ak detèminasyon,
Fortuné Gérald
Etidyan nan Management Business
Deplase nan komin Saut-d’Eau
Telefòn : (509) 3690-6478 gmail fgerald1994@gmail.com