Daprè yon atik jounal dominiken Listín Diario te pibliye nan dat lendi 9 dawout 2021, li eseye reponn ak kesyon sa : èske kapòt kapab pwoteje w kont tout maladi moun pran nan fè bagay ? Repons lan se non.
Byenke kapòt la ede nan pwoteje kont tout maladi moun pran nan fè bagay (MST), kapòt la pi efikas nan sèten kondisyon pase lòt. Genyen anpil maladi moun pran nan fè bagay, sèten ladan yo ou jwenn yo nan flid n ap site espèm, nan sekresyon vajinal ak nan san, n ap site VIH, gonore, klamidya, epatit ak trikomonaz, maladi sa yo kapab diminye pou enfekte avèk itilizasyon yon kapòt.
Sa yo kapòt la pa pwoteje
Lòt maladi moun pran nan fè bagay, pakont, kapab transmèt sèlman pa kontak po ak po lè zòn kote kontak la fèt la enfekte, tankou bouch oubyen ògàn jenital yo. Kèk egzanp maladi sa yo ki kapab transmèt epi kapòt la pa kapab anpeche sa se èpès, papilome imen, vèri jenital, sifilis, pou nan bibis (krab) ak gal imen.
Itilizasyon kòrèk
Si kapòt la itilize jan li dwe itilize, li kapab sèvi pou anpeche maladi moun pran nan fè bagay transmèt pa flid kòporèl, men kapòt la mwens efikas pou anpeche maladi po.
Men rezon ki fè kapòt la pa kapab pwoteje
Reyèlman, enfeksyon sa yo prezan nan kèk pati nan kò moun kote kapòt la pa kapab kouvri, tankou eskwotoum, baz peni an, bouda, lèv ak anwo kuis la. Pa egzanp, si yon moun genyen plè èpès oubyen vèri jenital sou eskwotoum oubyen otou baz peni an, yon zòn kote kapòt la pa kapab atenn, alòs moun nan kapab enfekte patnè li a pandan rapò seksyèl yo.
Swen medikal
Li enpòtan pou fè teste w pou MST oubyen pou maladi moun pran nan fè bagay, anvan menm ou kòmanse genyen vi fè bagay avèk patnè w, avèk entansyon pou pran swen si nesesè, anvan ou kapab transmèt li maladi moun pran nan fè bagay, ak tou genyen yon relasyon seksyèl ki pi asire. Anpil maladi kapab geri anvan w transmèt yo, men sèlman si maladi yo idantifye bonè. Pa bliye si w genyen kesyon, ou kapab konsilte << urologue >> ou.
Kredi atik : Listín Diario
Tradiksyon : Jacky Médé Fontaine
Centre à la UNE