Nan okazyon fèt Manman yo an AYITI, Jij sipleyan Tribinal seksyon Sid vil Gonayiv la, Majistra Esther Lebreton, distribye yon kantite kit ijenik ak sanitè bay divès Manman nan Lopital Lapwovidans Gonayiv ak kèk lòt Manman ki souvan lokalize yo devan katedral Gonayiv la. Se dimanch 28 me 2023 a ki make fèt Manman yo Jij la te fè jès sila.
Majistra Esther Lebreton nan entèvansyon l deklare « se ak yon santiman lajwa li prezan nan gran jou sa pou vizite Manman yo nan Lopital Lapwovidans ak pòv yo, epi fè ti pale ak yo pou di yo lavi pa fini menmsi yo pa jwenn ankadreman bò kote otorite yo nan peyi a.
Majistra Esther Lebreton
Majistra Esther di lide l se wè tout Manman ankadre nan sosyete a pou vakye ak aktivite ekonomik yo. Li di li swete Manman yo bòn fèt ak yon souri sou lèv li menmsi peyi a ap viv divès kalite pwoblèm.
Pi lwen, jij la di se ak fèb mwayen l li reyalize aktivite sa pandan l fè konnen lane k ap vini l ap travay pou fè plis Manman ak moun k ap mande devan katedral souvni Gonayiv la touche pa menm aktivite sila.
Divès nan manman benefisyè yo pa t mete dlo nan bouch yo nan okazyon an pou felisite ak remèsye Jij Esther Lebreton pou kit ijenik ak sanitè sa yo li fè yo jwenn nan jou espesyal yo. Manman deklare, yo swete Majistra Lebreton pase wè yo ankò pou pote kichòy pou yo nan yon lòt okazyon.
Fèt Manman an Ayiti, yon dat ki pase prèske inapèsi pou gouvènman Ariel Henry ap dirije a, puiske gouvènman an pa fè anyen pou make dat sila.
Israël CEDIEU, centre à la UNE