Vwayaj Ayiti/ Nikaragwa: Depatman deta Ameriken anonse madi 21 Novanm 2023 a, yo sanksyone propriyetè avyon ak responsab ajans vwayaj yo k ap òganize vwayaj Ayiti Nikaragwa. Etazini jele byen epi koupe viza tout moun sa yo li sanksyone a. Brian Nichols mande Ayisyen ak Kiben yo chwazi vwa legal pou yo rantre USA.
Depatman deta anonse yo pran desizyon pou anile viza ameriken tout moun k ap òganize vòl pou migran pase Nikaragwa, pou tonbe Etazini. Nouvèl politik sa adopte ayè madi 21 novanm 2023 a.
Gouvènman ameriken an di, konpayi k ap fè vwayaj sa yo ap pran kòb nan men moun yo, fè yo pran wout machin pou rive sou fwontyè Etazini. « Majorite nan migran sa yo pa gen okenn baz legal pou yo rantre ou byen rete Etazini, aprè yo fin depanse yon bann kòb, epi mete lavi yo ak lavi fanmi yo an danje », se sa Depatman deta ekri nan yon nòt ofisyèl. Yo mande migran Ayisyen ak Kiben yo pou pran vwa ki pi sèten, e ki pi legal pou rantre Etazini.
Anpil Ayisyen ki te deja genyen ant 3000 ak 2500 dola Ameriken nan men kèk ajans ki òganize vòl Ayiti Nikaragwa yo pa sispann plenyen akoz ajans yo ki pa deside remèt yo kòb yo malgre vwayaj yo kanpe.
Sadrax ULYSSE, Centre à la UNE