Nan yon rapò odisyon ki ale jwenn komisè gouvènman Mibalè a, mèt Gabriel FLEURY, vandredi 26 jiyè 2024 la, rapò ki lye ak odisyon Jean Michel NORELUS (Dunel) ki se manb yon group otodefans ki ap batay pou anpeche bandi anvayi vil Mibalè, e lapolis arete kòm moun ki ta nan konivans ak gang, fè divès deklarasyon devan polisye anketè yo.
Selon sa nou li nan rapò a, plizyè moun ki pa t dakò yo site non yo nan rapò a, denonse Dunel paske li fè plizyè konplo, li fè gang vini nan zòn Fon Dyab ak Fon Cheval epi li plase yo la.
Rapò a kontinye pou di:
- Dunel negosye ak yon moun yo rele Ricardo Guirand sou WhatsApp pou vann Ricardo yon fizi daso M16 nan dat 24 desanm 2023. De plis, li negosye ak Ricardo pou libere plizyè moun li t genyen nan men divès solda chèf gang Tilapli sou wout Matisan.
- Pa sms, li planifye avek Patoutou, Wawa, ak plizyè lòt prezime bandi ki te mawon pandan dènye operasyon lapolis te mennen Fon Dyab ak Fon Cheval 26 fevrye 2024. Li fè yo tounen, epi li enstale yo ankò nan Fon Cheval, selon rapò a.
Men sa Dunel li menm deklare bay lapolis: « Tout sa mwen fè yo, se delege Nickson ki di m fè yo, se li menm ankò ki te di m pa di lòt moun sa, n ap fè tout vini pou m ka arete yo ansanm. Li menm voye vwa mwen ka tande yon sèl fwa sou whatsap, vwa k ap efase kou m fin tande l. »
Rapò a fè konnen Dunel voye foto 2 ajan UTAG bay delege Nickson epi li ekri: 2 nèg sa yo se yo ki pi cho, yo vin aprè chèf UTAG la, yo di si se te mwen yo te jwenn lè yo te dezame nèg nou yo, yo t ap vide bal sou mwen san poze kesyon, paske yo gen lontan yo pa jwe dwèt yo. Mwen di mèt Telemarck sa pou kesyon lalwa, men m ap jere lòt bò a tou ak yo.
Delege a reponn: « Ok, n ap jere sa. »
Pi lwen, rapò a di Dunel voye foto 2 ajan UTAG yo bay plizyè lòt moun.
Nan menm rapò a, genyen non Jackson Charles lapolis te arete ansanm ak Dunel, rapò a di lapolis pa jwenn anyen sou li pou reproche l, li inosan, toujou selon sa ki ekri nan rapò a.
N ap raple, lapolis te arete Jean Michel Norelus alyas Dunel ak Jackson Charles nan vil Mibalè 22 jiyè pase a, yo te kondi yo nan komisarya Sodo a pou swit legal ak nesesè, epi yo te plase yo nan gadavi. Yo te jwenn nan men Dunel yon zam de pwent FN modèl FNX-40, ki gen seri FX2U011543, yon chajè epi 48 katouch.
Yon lòt bò, sou menm dosye a, Centre à la UNE te kontakte vis delege Awondisman Mibalè a, M. Luxon Pacombe. Parapò ak plizyè kesyon nou te poze li, men sa li di nou: « Wi m konn wè l, m rekonèt li. M pa gen okenn rapò pèsonèl ak Dunel. Mwen konnen Dunel kòm yon mekanisyen de pwofesyon.»
Foto vis-delege Awondisman Mibalè a, Luxon Pacombe.
Vis delege a kontinye pou di nou : «Mwen se yon nèg ki senp kòm la senplisite, mwen se moun ki renmen tout moun, mwen se moun ki kolabore ak tout moun, e mwen pa moun tou k ap janm fè sa ki pa sa […]»
Finalman, M. Pacombe konkli nan tèm sa yo: «Mwen pa fonksyone ak zam, mwen pa itilize zam. Tan mwen genyen depi m nan lari a, po ko janm g on moun ki te di yon jou li te wè mwen g on ti bagay nan men m […] M gen pouvwa pou m genyen l tou, men lesansyèl m still konnen se pa dènye rekou pou mwen […]»
Nan yon 1e tan, Me Jamann THELEMAQUE te kontakte redaksyon Centre à la UNE kòm avoka Jean Michel NORELUS alyas Dunel. LI te vle yon dwa de repons, puiske jounal la te pibliye sou arestasyon kliyan li a.
Nan yon dezyèm tan, mèt THÉLÉMAQUE te vin mande se jounal la ki pou kontakte li, nan sousi pou li bay vèsyon pa kliyan li a; kontakte avoka a pou ajoute vèsyon pa kliyan li a, li pa t kontinye reponn mesaj nou, ni resevwa apèl nou.
N ap raple se nan vil Mibalè, polisye UTAG arete plizyè moun pami yo Norelus Jean Michel alyas Dunel ki gen 33 lane. Arestasyon yo fèt lendi 22 jiyè 2024 la. Lapolis repwoche Dunel kòm moun ki ta nan konivans ak gang Wawa, Patoutou ak Bertin ki opere Fon Djab zòn Tè Wouj ak Fon Cheval..
Jean Launy AVRIL, Centre à la UNE.