Pri paspò pou Ayisyen k ap viv nan peyi etranje fikse a 100 dola ameriken pou timoun, 125 dola pou granmoun. Se Ministè Zafè Etranjè ak Kilt yo ki pran desizyon sa.
Ministè a di tout lajan yo ranmase yo pral dwat nan trezò piblik atravè anbasad Ayiti nan Washington.
Yo profite siprime tout sèvis ijans ak ekstrèm ijans yo nan tretman demand yo.
Konsèy Prezidansyèl la salye mezi, sa yo konsidere kòm jefò pou gen plis transparans nan fonksyònman misyon diplomatik yo.
Depi kèk tan gwo eskandal pa sispann repete nan konsila ak anbasad Ayiti yo nan peyi etranje, rèsòtisan gen difikilte pou jwenn sèvis, diplomat ki plonje nan koripsyon souvan kase kès enstitisyon sa yo pou angrese pòch yo ak sila ki mare sosis ak yo nan vann pòs diplomatik yo.