Premye jounen Asiz Nasyonal ki konsakre ak kesyon sekirite, eleksyon ak envestisman ann Ayiti te dewoule lendi 13 avril 2026 nan vil Okay, avèk prezans plizyè responsab leta, aktè ekonomik ak reprezantan dyaspora ayisyèn nan.
Rankont sa a, ki òganize pa Ministè Ayisyen k ap Viv Aletranje (MHAVE), te vize idantifye ansanm kèk solisyon konkrè ki kapab mennen peyi a sou chemen estabilite ak devlopman dirab. Inisyativ sa a montre volonte diferan sektè yo pou ranfòse dyalòg nasyonal la epi sere relasyon ak dyaspora ayisyèn nan, ki kontinye jwe yon wòl enpòtan nan efò transfòmasyon peyi a.
Pami entèvansyon ki te make jounen an, Direktè Jeneral Fon Nasyonal Edikasyon an (FNE), Mesye Elysé COLAGENE, te mete aksan sou enpòtans kontribisyon dyaspora a nan finansman sistèm edikatif la. Li raple valè prélèvman 1.50 dola ameriken sou transfè entènasyonal yo, yon mekanis ki deja sèvi pou soutni edikasyon ann Ayiti.
Daprè responsab FNE a, òganizasyon asiz sa yo se yon siy angajman klè diferan aktè yo pou pousuiv dyalòg la epi chèche mete tèt ansanm ak dyaspora a, ki rete yon patnè estratejik nan devlopman nasyonal la.
Grasa kalite echanj ki fèt yo ansanm ak divèsite patisipan ki te prezan yo, premye jounen an te pèmèt trase bon direksyon pou aksyon piblik yo nan yon dinamik estabilite sosyopolitik ki kapab favorize envestisman nan peyi a.