Eta Majò Fòs Ame Dayiti (FAd’H) anonse revokasyon de (2) sòlda premye klas 5 jen 2026 la, apre yon ankèt entèn ki te louvri sou ensidan ki te rive nan nuit 27 avril 2026.
Daprè yon lèt ofisyèl ki pote dat 3 jen 2026, de militè yo ta enplike nan zak ekstòsyon pandan yon patwouy nan zòn Delmas 31. Ankèt la fè konnen plizyè sitwayen te viktim chantaj ak menas pandan operasyon an.
Kòmandman siprèm FAd’H la estime aksyon sa yo pa ann amoni ak prensip disiplin, entegrite ak respè enstitisyon militè a dwe defann. Apre komisyon ankèt la te remèt konklizyon li yo, otorite yo pran desizyon pou mete fen ak sèvis aktif de sòlda yo nan enterè enstitisyon an.
Revokasyon an fèt ak dezonè pandan yon seremoni piblik ak solanèl ki te dewoule vandredi 5 jen 2026, an prezans Minis Defans lan, Mario Andrésol. Nan kad mezi sa a, ansyen sòlda yo oblije remèt san pèdi tan tout ekipman ak materyèl Leta te mete a dispozisyon yo.
Otorite militè yo fè konnen desizyon sa a demontre volonte FAd’H pou konbat tout fòm move konpòtman nan mitan twoup li yo epi prezève kredibilite ak imaj enstitisyon an devan popilasyon an.