Gouvènman ameriken an anonse li sispann sanksyon li te pran kont peyi Kolonbi yo, suit ak yon akò 2 peyi yo pran.Nan yon kominike lamezonblanch pibliye, aswè dimanch 26 janvye 2025, li fè konnen Kolonbi asepte kondisyon pou depòte migran ilegal yo nan avyon militè.
Se peyi Etazini ki anonse nouvèl la avan. Nan yon nòt Pòt-pawòl White House la Karoline Leavitt pibliye, byen ta ayè dimanch 26 janvye a, administrasyon Trump lan di gouvènman Kolonbyen an aksepte tout kondisyon yo, pami yo, « aksepte san restriksyon », tout migran Kolonbyen ilegal k ap soti Etazini, nan avyon militè ameriken, « san limit, san reta ». Se sou baz sa a, Washington anonse li leve tarif ak sanksyon ekonomik yo, men li toujou kenbe sanksyon viza a, jiskaske premye avyon depòte yo ateri Kolonbi.
Bò kote pa yo, gouvènman Kolonbyen an konfime te gen yon echanj ak Etazini sou dosye a, ki te vin debouche sou yon akò. Kontrèman ak sa Lamezon Blanch di, Cancilleria Col ki se Ministè Afè Etranjè peyi Kolonbi di li menm, se yon avyon prezidansyèl ki dispoze pou fasilite konpatriyòt Kolonbyen yo retounen nan peyi yo. Pou fè suivi akò ki jwenn nan, gen yon delegasyon Kolonbyèn k ap gen pou rann yo nan Washington, nan èd tan k ap vini yo.