Yon gwoup moun nan vil Tomasik manifeste epi bloke wout vandredi 1e jiyè 2022 pou mande responsab MTPTC yo konstwi twonson wout Ench Tomasik la pou yo.
Plizyè santèn moun nan vil Tomasik depatman sant pran lari maten vandredi 1e jiyè 2022 pou manifeste pou mande enjenyè « Rosemond Pradel ki se Minis travo piblik transpò ak kominikasyon peyi dAyiti» pou li degajel prese prese pou li fè twonson wout Ench Tomasik la ki nan yon move eta.
Pwotrestatè yo te kwaze plizyè machin nan mitan wout la nan zòn: lowòb, kaney ak yowonn. Sa ki te paralize sikilasyon an pou jounen vandredi 1e jiyè a. Anpil ti machann ki te sòti Ench pou ale vann nan mache Tomasik la te nan gwo difikilte pou travèse.
Manifestan yo pase nan divès ri nan komin Tomasik akonpaye de bann rara pou mande leta konstwi twonson wout Ench Tomasik ki koze anpil aksidan sitou nan peryòd lapli. Yo tou pwofite mande kote lajan wout Tomasik Ench la pase.
Èske te genyen yon lajan efektivman ki te la pou fè wout Ench Tomasik la?