Pòtoprens, 26 out 2022
Kominike pou laprès:
Rantre lekòl la fikse pou lendi 3 oktòb 2022 pou ane akademik 2022-2023
Apre desizyon ki pran sou plizyè dosye tankou rantre lekòl ak lòt nan Konsèy gouvènman ki fèt jodi vandredi 26 out la, Ministè Edikasyon Nasyonal ak Fòmasyon Pwofesyonèl (MENFP) ap fè tout popilasyon an konnen sitou kominote edikatif la rantre lekòl la pou ane akademik 2022-2023 a ap fèt pito nan dat lendi 3 oktòb 2022.
Ministè a ap gen pou pibliye nan jou kap vini yo nouvo kalandriye eskolè 2022-2023 k ap bay tout presizyon sou dat ki pi enpòtan pou ane akademik 2022-2023 a.
Ministè a pwofite bay tout paran, anseyan ak direktè lekòl yo garanti nouvo kalandriye eskolè a ap respekte kantite jou yon ane lekòl dwe genyen pou aprantisaj timoun yo fèt kòmsadwa.
Biwo kominikasyon/MENFP