Se vendredi 26 dawout 2022 a Konsèy Gouvènma an te pran brèf desizyon anile dat ouvèti klas ane akademik 2022- 2023 ki te fikse pou 5 sepatanm 2022 epi ranvwaye li pou lendi 3 oktòb. Minis edikasyon an, Mesmy Manigat, fè konnen desizyon sa pran paske yo konstate paran yo pa t ko prè pou voye ti moun yo lekòl koz ensekirite ak lavi chè.
Plizyè sitwayen k ap viv nan sant vil Boukankare ( Chanbo) deklare se pa sèlman paran yo ki pa t prè men Leta li memm tou pa t ko pare pou fè antre klas la. Yon lòt kote, sitwayen sa yo fè konnen yon Leta ki responb, ki sousye pou kesyon ledikasyon timoun pa t ap ka kite lise a ap fonksyone nan yon batiman ki delabre konsa.
N ap raple w lise Dijon Jean Gill ki chita kòl nan vil Boukankare. depatman sant peyi Dayiti fonde nan ane 2006 sou manda Majistra Benicé Dérat. Li resevwa plis pase 200 ti moun chak ane. Li fonksyone an doub vakasyon: youn nan maten lòt la nan aprè midi. Vakasyon maten an resevwa seksyon fondamental la e sa midi a akeyi seksyon segondè a.
Pandan paran yo ap achte materyèl eskolè ak chèche lajan pou prepare antre lekòl ti moun yo, yo pwofite mande Leta pou yo prepare sal klas yo paske li pa nòmal pou yo peye koud inifòm nèf pou elèv pou se nan yon espas konsa Leta ap akeyi yo.
Louissaint Banel, Boucan-carré, Centre à la UNE .
