Anviwon 8 moun mouri nan kolera ak kèk lòt ka sispèk nan peyi Ayiti, se Direktè jeneral ministè sante piblik ak popilasyon an Doktè Lauré Andrien ki anonse nouvèl la nan yon konferans de près li bay dimanch 2 oktòb 2022 a.
Ministè sante piblik konfime nan konferans sila ka pozitif kolera nan zòn savann pistach nan katye kafou fèy ak plizyè ka sispèk nan site solèy nan katye Brooklyn.
Doktè Adrien fè konnen y ap fè tout sa yo kapab nan nivo ministè a pou evite propagasyon kolera a nan lòt zòn yo. Pandan li presize moun ki mouri yo se nan kominote yo ke yo mouri paske yo pat gentan ale lopital.
MSPP mande tout moun respekte règ ijyèn yo tankou bwè dlò trete, lave men yo pou evite trape kolera.
N ap raple epidemi kolera te sakaje popilasyon ayisyèn nan lane 2010, li te touye plis pase 10 000 ak anviwon 820 300 lòt te enfekte e sete sòlda peyi Nepal ki te nan misyon ONU te voye ayiti ki rantre ak maladi sa nan peyi a.