Popilasyon Wanament lan nan Nòdès Ayiti bloke fwontyè Ayiti-Repiblik Dominikèn nan zòn Dajanbon lendi 21 novanm 2022 a, pou pwoteste kont fason gouvènman Dominiken an ap maltrete migran Ayisyen epi voye yo tounen.
Plizyè moun nan popilasyon an nan wanamèt te manifeste, depoze plizyè pankant ki te genyen anpil pawòl piman bouk kont prezidan Dominiken an, Luis Abinader sou pòt rantre Fwontyè a pou denonse konpòtman rasis gouvènman Dominiken an ap afiche kont Ayisyen nan Repiblik Dominikèn.
Protestatè yo fè konnen komès la plis profitab pou dominiken yo nan fè yo fè anpil lajan poutan yo san respè pou migran ayisyen y ap vyole dwa yo chak jou malgre Nasyonzini te mande gouvènman Dominiken an pou li te sispann maltrete ayisyen yo e prezidan Luis Abinader pa tande rezon.
Pandan tan sa, anbasad Amerikèn ki nan Repiblik Dominikèn lanse yon alèt ak tout Ameriken yo pou enfòme de sa k ap pase nan peyi Sendomeng kote yo imigasyon pa teni kont de nasyonalite moun yo, men yo plis baze sou koulè po yo.
N ap siyale, Ayisyen sibi anpil agresyon fizik ak moral, plis lòt abi nan moman depòtasyon yo.