Nan yon nòt Kolektif Ansyen Depite Opozisyon ak Alye l yo (KADOA) mete deyò lendi 22 me 2023 a, ki pote siyati Vikerson GARNIER, Ansyen Depite Tyòt Kòdonatè ak Abel DESCOLLINES, Ansyen Depite Mibalè epi pòt pawòl, yo egzije Ministè komès ak endistri pou bay pri tout pwodui premye nesesite yo sou tout teritwa nasyonal la pou pèp la kapab rale yon ti souf anba move lavi.
Nan nòt sila a kolektif la di devan kalamite ensekirite, blakawout, ratman gaz, grangou, lavi chè elatyriye, mande Ministè Komès ak Endistri poukisa li refize fikse nouvo pri tout pwodwi premye nesesite yo sou mache lokal la?
KADOA fè konen li konstate tout pri pwodwi premye nesesite yo kontinye rete tèt nèg malgre gwo bese ki fèt nan to dechanj ant dola ameriken an ak lajan pa nou an ki se goud la. Kolektif la mande, èske pèp la pa gen dwa jwenn pwoteksyon Leta kòm regilatè
KADOA kontinye pou di li pa rive konprann poukisa se sèl pri espageti, bwat lèt epi lwil ki fè yon ti bese tou piti sou mache a, swivan kapris machann yo, epi otorite ki la yo rete bouch fèmen.
Toujou selon nòt la, KADOA pwofite raple tout moun, gwo enpòtatè ak gwo revandè yo toujou di se akoz monte to dechanj dola ameriken an parapò ak goud la ki fè yo konn oblije ogmante pri pwodwi premye nesesite yo nan magazen ak mache yo. Poukisa kounye a yo poko deside desann pri pwodwi sa yo pandan tout moun konstate to dechanj dola ameriken an parapò ak goud la desann depi kèk tan?
KADOA di li rete kwè ke nan moman sa, pèp la ta dwe rale yon souf. Poutèt sa, li mande prese prese pou Ministè Komès ak Endistri fè travay li kòm sa dwa : Bay nouvo pri pwodwi premye nesesite yo. Boutofen, KADOA tou pwofite mande gouvènman an, pou l fikse pozisyon l sou mache nwa k ap fèt nan ponp gazolin yo nan zafè gaz la.
Sadrax Ulysse, Centre à la UNE