«Jefò pou deplwaye yon fòs miltinasyonal pou ede Ayiti batay kont gang yo ap pouse pou pi devan.» Se sa Brian Nichols ki se Sou Sekretè Deta pou Zafè Emisfè Oksidantal la di VOA jedi 16 novanm 2023 a nan yon atik Sandra Lemaire tradui sou dosye sila.
«Eben, n ap fè anpil pwogrè. Palman Kenyan an apwouve deplwaman an ak kèk kondisyon, n ap travay ak patnè nou yo toupatou nan emisfè a pou lye pou fè fòmasyon an, epi Etazini deja pran angajman pou kontribye a 250 milyon dola pou apiye jefò sa a. Gen lòt peyi toupatou nan mond lan ki endike yo menm tou yo vle kontribye a jefò sa a; swa ekonomikman swa ak ekipman. Nasyon-Zini ap travay pou kreye yon fon espesyal kote peyi yo ka kontribye finansyèman pou apiye misyon fòs miltinasyonal la.»
Nichols ki te pale ak konfrè nou, jounalis VOA Espayòl, Jorge Agobian sou dosye saa di: «Vrèman vre, Palmantè Kenya yo vote jedi anfavè demann pou deplwaye plizyè santèn polisye an Ayiti pou ede peyi a jere zak vyolans gang yo.»
Lidè adjwen Palman an, Gladys Boss te lanse apèl pou yo vote, e palmantè yo te apwouve deplwaman an. Yo site yon rapò ki di deplwaman an akò ak demann konstitisyonèl yo, e li pran an konsiderasyon opinyon piblik la yo te ranmase ant 2 ak 9 novanm.
Nan mwa jiyè a, Kenya te ofri pou l kontribye 1,000 polisye nan fòs la apre Ayiti te mande asistans kominote entènasyonal la. Sepandan, nan komansman mwa oktòb la, yon pati opozisyon Kenyan t al nan tribinal kote Jij la te akòde l yon lòd pou sispann deplwaman an. Pati opozisyon an te plenyen pou di plan an pa t pran an konsiderasyon opinyon piblik la e li te enkonstitisyonèl paske se sèlman lame a ki ka deplwaye nan peyi etranje.
Sou Sekretè Deta Ameriken Brian Nichols di sipò pou fòs la ap ogmante tou an Ayiti.
«Gwoup Pèsonaj Eminant CARICOM nan ki gen 3 ansyen premye minis peyi Karayib yo ladann fèk vwayaje Ayiti kote yo pale ak divès politisyen ak objektif pou jwenn yon konsansis pi laj vizavi kestyon gouvènans la an Ayiti. Nou rekonèt se yon sityasyon ijan e n ap fè anpil pwogrè vizavi deplwaman an ke gouvènman Ayisyen an te mande. Sondaj ki fèt an Ayiti endike tou yon majorite Ayisyen apiye misyon sa a.»
Gabriel Tongoyo, direktè komisyon Administrasyon ak Sekirite Entèn Palman Kenya a di manda misyon polisye a se yon lane e ke Nasyonzini pral peye tout frè yo.
Yon odisyon tribinal sou defi opozisyon an pa rapò ak legalite deplwaman an pral dewoule 26 Janvye 2024, daprè sa Charles Midenga, avoka moun ki prezante petisyon an di ajans nouvèl Reuters.
Sous: VOA kreyòl