Ansyen depite Alfredo Junior Antoine pa reponn envitasyon komisè Pakè Pòtoprens lan mèt Edler Guillaume jodi Lendi 27 Novanm 2023 a.
Selon Avoka Ansyen depite a, mèt Sonèt Saint- Louis ki t ap reponn kesyon Jounalis devan pakè Pòtoprens lan, mèt Edler Guillaume pa konpetan ase pou tande ansyen depite Alfredo pou koripsyon. Pakè a pa non plis yon tribinal. Avoka Saint- Louis presize kliyan li an prè pou reponn kesyon lajistis sou akizasyon kont li an men se devan yon tribinal konpetan.
N ap raple, ansyen lejislatè Kenskòf Alfredo Antoine akize nan dènye rapò Inite k ap batay kont Koripsyon Ayiti a (ULCC) Kòm moun ki blanchi 8 638 053,13 goud lajan ONA, pou yon kay li vann enstitisyon an pou loje yon lekòl siperyè sou enfliyans ansyèn direktris adjwen an Stephanie Mondestin.
Pou fini, sou kont twitè ansyen depite Kenskòf la li pibliye:<< Pabliye mwen te pami depite ou te kontakte pou m te entèsede kote prezidan Moïse pou w te vin DG ULCC. Se chak aprè midi ou te nan biwo m. Ou twò sal pou w voye labou sou kostim blan pèp Kenskòf la te mete sou mwen an konze, trèt>>. Donk, eske nominasyon nan fonksyon piblik Ayisyèn nan se yon mannyè pou rale fèy kouvri sa pou gwo Palto yo?
Washington Florvil, Centre a la UNE