Aprè anpil atant Wendy Duvert ki gen fanatik li yo li rele Chinwa, sòti 4yèm albòm li 21 Janvye 2024 la ki gen pou non « Trois ».
Leyoganè a ki otopwoklame tèt li king rap depi 2010, otè ; plizyè albòm notamman; Majeste 2013, Endetwonab 2016, King rete king 2018, ak dènye opis la ki gen pou non Twa (Trois) 21 janvye 2024, san bliye yon Mixtape denome G-Bobby Mixtape 2014, plis yon EP ki gen pou non Patron 2022, Yon tablo byen gani pou 14 lane karyè pou fanatik ak bonè endistri mizikal Ayisyen.
Lidè kominote Chinwa a pa sispann kreye pale anpil sou entènèt la keseswa ak silans li, mizik li, e pou divès lòt polemik jeneralman fanatik li enplike nan non l. Sepandan san konteste Wendy Duvert se atis ki plis enfliyan nan jenerasyon l lan notamman nan milye mizikal ayisyen an, selon divès animatè tankou ; Rbens Melodi, Carel Pedre pou n site sa yo selman.
Twa se dènye opis atis la sòti, kote l sanble depoze kouwòn nan pou l pran vès PDG, Patron, epi erije l nan tout dimansyon mo an antank CEO, lidè kominote l la, aparamman pou yon pi gwo pwojè ki pa sèlman mizik. Twa gen ladann 9 tit avèk divès kolaborasyon tankou; Men li avèk thelo, Pla konplè avèk Danola epi Mèsi avèk Ansy Derose, pou n site sa yo selman.
Mèsi se yon chedèv de Ansy Derose ke Wendy itilize nan yon fason nòb pou l remèsye tout sila ak tout aderan ki toujou sipòte, defann ak akonpanye l pandan 14 lane karyè, bref pou sila yo ki konstitiye gran fanmi an ki denome Chinwa Gang.
Jefferson BONISSANT, Centre à la UNE!