Lidè pati federalis la Gary Guiteau, ki se ansyen depite Laskawobas nan 45èm ak 46èm lejislati a, nan yon nòt li fè rive jwenn Centre à la UNE jedi 22 Fevriye 2024 la, denonse politik lese grennen gouvènman Ariel Henry a pandan l pwofite pase men pran ansyen kolèg li Edmonde Supplice Beauzile li kwè kap manniganse pou rive mete atè do katèl meri mibalè a ki gen nan tèt li majistra Lochard Laguerre.
« Kolèg Edmonde, Majistra Lochard plis itil moun plato santral ke gouvènman w ap sipote a. » se konsa Gary t ap pale. Pandan li kontinye ak deklarasyon l konsa:
« Mwen panse olye w atake deklarasyon Majistra Laguerre fè sou sitiyasyon moun plato santral k ap monte yon maswife akoz bandi ki pran kontwòl mòn kabrit, kote yo achte l lajan kontan, li ta pi bon kolèg pou w ta resezi w epi retire tout solidarite w ak gouvènman sa a ki se yon wont nasyonal »
Nan menm okazyon an Depite Gary GUITEAU pwofite voye yon kout chapo pou magistra Laguerre li di k ap fè yon bon travay nan goumen kont bandi e li felisite majistra a pou kouraj li . Li te fini nòt li a ak fraz saa « Mwen di w kenbe la majistra Laguerre ou pa pou kont ou nan batay la »
Daniel Jean, Centre à la UNE !