Widolf Pierre, Renaldo Pierre,Renalson Pierre, Jamesta Marcelin, se non 4 moun manm yon sèl Fanmi bandi asasine nan sware 16 pou louvri 17 jen 2024 la nan Dèlma-33 Ayiti.

Selon enfòmasyon ki disponib yo krim sa fèt nan mitan lannuit kote plizyè moun ki abiye ak inifòm polis rantre nan kay viktim yo t ap viv lan epi vide bal sou Widolph Pierre, Renaldo Pierre, Renalson Pierre ki se 3 frè, aprè sa yo fizye Jamesta Marcelin ki se kouzin mesye yo ki te nan kay la ak yo.

Yon sous Centre à la UNE te kontakte fè konnen mesye dam ki asasine yo te kouri kite kay yo t ap viv nan Dèlma-9 akoz bandi ki t ap bay problèm nan zòn sila, kote yo ta pral pran refij yo nan Dèlma-33 zòn yo asasine a.

Bandi yo pa sispann simen latroublay nan rejyon Metropolitèn Pòtoprens lan, chèf kowalisyon viv ansanm nan Jimmy Cherisier alyas Babekyou nan yon videyo te deklare yo pral pi agresif nan atak yo e li te menm anonse li pral frape tout boujwa ki ap viv nan komin Dèlma kote li kontrole.

Pilwen Lanmò Sanjou ki se chèf gang komin Kwadèboukè a te montre nan yon videyo semèn sa yon gwo sòm lajan li di pou li te fè pewòl pou sòlda li yo pandan li t ap fè elòj pou montre kòkòday li ak chèf gang Kanaran an Jeff gwo lwa.

Sou nouvo gouvènman Garry Conille ap dirije a zak bandi yo pa sispann ogmante alòske prezidan Kenya a William Routo te di nan 2 semèn premye twoup Kenya a ta dwe rantre Ayiti pandan dèle saa prèske ekspire poko genyen siy ki montre fòs la ap rantre tout bon vre. Rod Joseph ki se yon ansyen sòlda emriken dorijin ayisyènn fè konnen ekipman pou depwaman fòs la poko prè.

N ap raple nan Depatman Latibonit , komin Gwo Mòn bandi Tibradòm yo touye anviwon yon 10 zèn moun semèn pase a.

Sadrax ULYSSE, Centre à la UNE

By Centre à la UNE

Centre à la UNE se yon ajans an liy ki bay nouvèl nan tout rakwen peyi Dayiti ak rès Mond lan. Nouvèl nou yo kredib e verifye ak yon rezo jèn jounalis profesyonèl e konpetan. Ou ka kontakte nou nan: journalcentrealaune@gmail.com e +549 351 262 7841