Lè elektè Ameriken yo te ale vote nan eleksyon prezidansyèl 5 novanm 2024 la, yo te chwazi ansyen prezidan Donald Trump kòm 47èm prezidan Etazini an. Se te yon eleksyon ki te chaje ak anpil tansion, diskisyon ak divizyon nan mitan popilasyon an. Retou Trump nan Mezon Blanch la pote anpil kesyon e li soulve anpil atant pou administrasyon li an, pandan l’ap tann enpak sou Etazini ak sou relasyon entènasyonal yo.
Konsteks Eleksyon an
Trump te konfwonte yon eleksyon difisil kote l te fè fas ak yon gwo opozisyon nan pati Demokrat la, ak tout kandida ki te eseye anpeche retou li nan pouvwa. Malgre tout kontradiksyon ki te egziste kont li, fanatik li yo rete fidèl, epi yo reyisi pouse li retounen nan Mezon Blanch lan apre kat ane deyò.
Atant Domestik: Reprann Ekonomi ak redresman Politik
Anpil elektè ki te vote pou Trump fè sa avèk espwa li pral reviv ekonomi an, ki te afekte pa efè chanjman ekonomik mondyal ak gwo kriz finansye. Retou Trump la tou soulve espwa lakay anpil Ameriken ki ap tann wè jan li pral travay sou politik domestik li te enpoze deja, tankou sekirite, rediksyon taks, ak ralantisman imigrasyon an. Sepandan, kèk lòt segman nan popilasyon an gen kè sote sou fason Trump pral jere dosye sosyal yo, tankou pwoblèm klima, dwa moun ak enpak sou kominote imigran yo.
Enpak entènasyonal: relasyon Etazini ak Rès mond lan
Prezidan Trump gen yon vizyon inik pou politik etranjè Etazini, ki chita sou pwomès « America First » li a. Retou li a ka chanje estrateji diplomatik Etazini, espesyalman anver Lachin ak Larisi, osi byen ke nan relasyon ak alye tradisyonèl tankou l’Ewòp. Anpil peyi ap tann wè si Trump pral re-negosye akò komès ak alyans entènasyonal yo, epi si l ap kontinye estrateji san parèy li te genyen nan premye manda li a.
Perspectiv politik yo: divizyon e potansyèl Chanjman Sosyal
Eleksyon sa a mete yon lòt fwa anfas divizyon ki egziste nan sosyete Ameriken an, kote popilasyon an separe ant moun ki soutni vizyon Trump nan ak lòt ki panse administrasyon li an ka yon menas pou demokrasi Etazini. Retou li nan pouvwa a ka kreye plis polarization, men li ka tou pote opòtinite pou refleksyon sou fason sistèm demokratik Etazini an ka adapte yo ak nouvo defi yo.
Prezidan Trump ap gen yon gwo responsablite pandan dezyèm manda li a, pandan l ap fè fas ak gwo atant ak enkyetid lakay popilasyon an. Nan moman sa a, se yon chapit enpòtan pou istwa Etazini e rès mond lan, pandan tout moun ap tann wè si Trump pral satisfè espwa ak pèspektiv popilasyon Ameriken an, oswa si nouvo manda sa a pral pote nouvo defi pou Etazini e pou relasyon entènasyonal yo.
Jean Launy AVRIL, Centre à la UNE