Nan peyi d’Ayiti, enpinite vin tounen yon sistèm byen etabli, ki fin rasanble ak rafine tout fòs nan Leta. Enpinite pa sèlman yon erè nan jistis, li se yon estrikti fonksyonèl, yon pati nan sosyete ayisyèn kote koripsyon an byen akeyi, pwoteje, e menm onore. Se tankou yon seremoni kouwònman kote moun ki manipile resous piblik, ki pase dwa sitwayen yo anba pye, ak ki abize pouvwa resevwa pwomosyon olye yo sibi konsekans.
Nou konprann enpinite kòm yon maladi ki gaye epi ki depafini sosyete a. Men sa k fè plis mal, se pa sèlman lefèt ke jistis fèmen je sou zak sa yo, men se akseptasyon sosyal la, kòm si koripsyon tounen yon nòmalite. Lè nou wè ansyen dirijan, ansyen manm Leta, ak biznisman ki te ekspoze nan eskandal kontinye evolye ak prestij ak respè, sa voye yon mesaj klè bay tout moun : nan peyi sa, ou pa bezwen rete onèt pou reyalize, ou sèlman bezwen gen konplisite.
Sa ki pi grav, se jèn yo, jenerasyon k ap vini yo, ki asiste chak jou ak efondreman valè moral yo. Enpinite kreye yon modèl move egzanp. Li fòme lide jèn yo sou sa ki akseptab, sou sa ki nòmal nan peyi sa a. Sa vin tounen yon eritaj kote tout moun aprann aksepte ke enpinite se senbòl siksè.
Noumenm nan Centre à la Une, nou kwè tan an rive pou sosyete a rete sou pye, pou li eksije responsablite ak moralite nan men lidè yo. Nou pa ka tann yon lòt jenerasyon grandi nan yon sistèm ki admire e ki monte koriptè yo sou yon pyedestal. Tan an rive pou n sonje Ayiti te yon jou yon tè revolisyonè, yon tè kote libète, onètete, ak respè pou dwa moun te pi wo pase tout bagay. Se tan li pou nou tounen nan rasin sa yo epi rekonstwi yon peyi kote lajistis, dwa, ak onètete genyen plas yo.