Pou Konseye Prezidansyèl Fritz Alphonse Jean
Sent Sizann nou mele !
Prezidan, si Ogou Balendjo pa t anba dlo nan moman sa, li t ap di w : » Vèditè lè w pa gen anyen pou w di, fèmen bouch ou ! » Ekselans, apre 7 mwa se pawòl pou n kontinye ap vale toujou ? Prezidan an de mo twa pawòl ki wòl ou menm ? Nòt 26 novanm 2024 ou an, sanble kou de gout dlo ak pwotestasyon yon gwoup moun Granpre, k ap denonse KAZÈK ki pa netwaye kannal. Pouse bourik ou prezidan ! Lepèp kòm enbesil, n ap kontinye pran pengwen pou zannanna.
Men prezidan, m kontan anpil, ou felisite pèp la ak fòs lòd yo k ap reziste anba bandi kriminèl ak zong yo. Bèl bagay ekselans, lajan ransèyman w, pil sekirite w nan dada w epi gang ap touche nan pòs peyaj sou wout yo, sazinen, vyole, kidnape lepèp ; epi w ap djaze : » O twòp san koule ! » Prezidan, ou konn bwè ? Gen lè pandan w ap ekri nòt la, Lenglensou te sele w, li kite w anba tafya. Prezidan, nòt ou an tèt anba san okenn presizyon. Kilès gouvènman pase ki te nan banditis yo ? Pa gen pwoblèm kontinye kache pou w jere ti espas pouvwa w. Ekselans, kote w ye la se Lavalas Aristid, Preval ; Tèt Kale Mateli, Privè Jovnel, Ariel ; Anbasad Meriken, Kò Gwoup ; se sa yo ki lepase san retire yon yota ki la. Ou vle di n se yo ki te toujou asosye ak bandi ? Antouka, si se memwa w pa genyen chèf la, mwèl bèf ak mwèl kabrit bon pou sa anpil.
Prezidan, ti koze sa m te sere l pou m te pale avè w an dènye, apa m wè ou tounen nan pawòl ekonomi vyolans lan ? Prezidan m tèlman ri, blòk dan m rache. M konnen w entèlijan ; blòf ki te mete w anlè a p ap ka kontinye kenbe w. Envante yon lòt pawòl, souple prezidan, pa vini ak koze tranzisyon koupe fache a pou m pa rekòmanse griyen dan m tankou moun fou.
Anvan chape poul mwen ekselans, m ap poze w ti kesyon sa yo ; nouvo ekonomi vyolans lan entegre ni gang ak sapat, ni prezidan kasè bank ? Nou tout 9 manm Konsèy la, menm brakè yo kontinye ap bay enstriksyon yo nòt la fè referans lan ? M fini ekselans, men kònmsi m wè w pa reponn Macron? Pawòl « con » an sanble w prezidan? Pa imilye m ekselans, reponn mwen.
Ayiti ! bèl ti peyi lè nèg sou pouvwa ! Se pa vre ekselans?
Gran Pre, 26 Novanm 2024
Hugue CÉLESTIN
Manm: » Federasyon Mouvman Demokratik Katye Moren (FEMODEK) »
Manm: » Efò ak Solidarite pou Konstriksyon Altènativ Nasyonal Popilè (ESKANP) «