Ajan PNH ki te jwenn sipò manm brigad otodefans Canapé-Vè te fè yon operasyon miskle nan Christ-Roi, pase nan Delmas 32, kote plis pase (15) kenz bandi mouri nan afwotman, epi plizyè zam sezi, madi 18 mas 2025 la.
Yon repons pwopòsyonel ak miskle reyalize nan lokal Fondasyon pou Sante Repwodiksyon ak Edikasyon Fanmi (FOSREF) nan Christ-Roi kote pa mwens pase (15) kenz bandi te ansèkle epi elimine pa ajan PNH. Dapre yon sous kredib ki te mande pou l ret anonim, nan operasyon sila plizyè zam sezi tankou; fizi atak, ki gen ladan yon M-4 modifye ak yon AKA-47 kalashnikov, ansanm ak yon pistolè 9mm, te remèt ala lapolis.
Depase pa atak lapolis sila, yon bon kantite bandi te pran refij nan riyèl Moïse, men yo ta pral kwaze ak manm brigad oto-defans Christ-Roi ak Canapé-Vert, kote yo ta pral jwenn egzekisyon yo.
Yon lòt bò, pa mwens pase (4) kat kadav san vi tabli sou asfalt la, nan Delmas 32.
Pou kounye a, gwo eksplozyon toujou ap sonnen nan Delmas 30, 32 ak Christ-Roi kote popilasyon sivil la, ak gwoup oto-defans, akonpanye ak lapolis ap goumen a tout fòs yo pou kwape kriminèl ki pa sispann teworize popilasyon an.
Nap raple canapé-Vè jiska dat rete pi gwo senbòl rezistans, nan batay kont kriminèl ak zam ki déjà akapare plis pase 80 pousan tèritwa nan rejyon metwopolitèn nan.