Nan yon entèvyou li bay sèlman ak ajans Reuters 14 Out 2025 lan, responsab konpayi « Vectus Global » la fè konnen, li jwenn yon akò a gouvènman Ayisyen an sou sa. Antrepriz sa ki espesyalize nan retabli sekirite nan peyi danjere, gen misyon pou batay kont gang kriminèl yo an Ayiti.
Erik Prince ki pa di konbyen kòb leta Ayisyen peye l, fè konnen pandan anviwon yon lane, yo ta dwe batay pou pran kontwòl wout prensipal ak teritwa gang yo pran yo.
Daprè sa espesyalis nan sekirite a di Reuters, depi sitiyasyon sekirite a stab, antrepriz li a ta dwe enplike nan mete kanpe yon pwogram ki vize takse tout machandiz kap enpòte atravè fwontyè Ayiti ak Repiblik Dominikèn.
« Vectus Global » ki kòmanse opere Ayiti depi mwa Mas pase a, deja deplwaye plizyè dwonn, an koòdinasyon ak yon gwoup travay Premye minis lan ap dirije. Yon sous di ajans Reuters, operasyon kont gang yo pral ranfòse nan semèn kap vini la, kote yo pral deplwaye plizyè santèn konbatan ki se espesyalis nan tire epi nan ransèyman ak kominikasyon, ki soti Etazini, an Ewòp ak Salvador. Yo ta dwe itilize bato ak elikoptè pandan operasyon yo