Konseye-Prezidan Frinel Joseph te resevwa, jounen madi 2 septanm 2025 lan, dokiman ki reprezante rapò reyinyon ak konferans Tab Sektoryèl sou Sekirite a (TSS), ki fonksyone sou direksyon Sant Analiz ak Rechèch sou Dwa Moun lan (CARDH). Seremoni sila a te dewoule nan otèl Karibe nan Petyonvil.
TSS la te tou prezante yon kopi dokiman ki gen rapò ak premye seri reyinyon li yo, bay reprezantan Fòs lòd yo ak patnè li yo sou kesyon ensekirite nan peyi a : Polis nasyonal la, Fòs Lame a, Misyon miltinasyonal pou Sekirite a, Wo Komisarya Nasyonzini pou Dwa Moun lan (HCDH), Biwo Entegre Nasyonzini an Ayiti an (BINUH) ak Òganizasyon Eta Ameriken yo (OEA).
Nan okazyon sila a, Konseye-Prezidan Frinel Joseph fè konnen dokiman TSS la reflete doleyans sosyete sivil la. Konsèy Prezidansyèl la pral chita pou itilize ide ki soti nan dokiman an pou ranfòse estrateji ak detèminasyon Leta a nan goumen pou tabli Lapè nan peyi a pou li ka rive òganize bon jan eleksyon.