Lapolis arete Arnel Bélizaire nan Petyonvil sou baz manda lajistis te mete dèyè l pou finansman gang teworis, konplo kont sekirite Leta, asosyasyon malfektè. Pou kounya, li nan Direksyon Santral Polis Jidisyè (DCPJ), l ap tann yo transfere l Pakè Pòtoprens. Polis Nasyonal Ayiti (PNH) angaje l nan lit kont ensekirite sou tout fòm.
Sou manda, Direksyon Santral Polis Jidisyè arete ansyen depite ayisyen an samdi 14 mas pase a nan komin Petyonvil, nan depatman Lwès.
Ansyen eli a dèyè bawo pou plizyè enfraksyon grav, tankou finansman teworis, atanta ak konplo kont sekirite enteryè Leta epi asosyasyon malfetè, pou nou site sa yo sèlman.
Aprè arestasyon li, Polis Nasyonal Ayiti nan yon piblikasyon ki fèt sou paj ofisyèl Facebook li, kominike sou sò ansyen depite Dèlma/Taba.
Nan dokiman an, Polis Nasyonal Ayiti enfòme Arnel Bélizaire fèmen nan Direksyon Santral Polis Jidisyè pandan l ap tann li prezante devan pakè Pòtoprens pou yon jij tande li sou akizasyon ki kenbe kont li yo.
Jiskaprezan, ansyen reprezantan sikonskripsyon Dèlma/Taba pase deja plizyè nuit nan gadavi nan Direksyon Santral Polis Jidisyè aprè arestasyon li.
Jacky M. Fontaine, Centre à la UNE