Anviwon dis (10) jou anvan reouvèti klas yo pou ane akademik 2026-2027 la, Ministè Edikasyon Nasyonal ak Fòmasyon Pwofesyonèl (MENFP) anonse, vandredi 21 out 2026 la, piblikasyon rezilta egzamen ofisyèl 9yèm ane fondamantal (9yèm AF), Bakaloreya ak Lekòl Nòmal Enstititè ak Jadinye Timoun (ENIJE).
Pou 9yèm AF, rezilta yo disponib nan uit depatman. Nò anrejistre yon to reyisit 93,45 %, ak 17 945 kandida admis sou 19 203 patisipan. Li swiv pa Lwès, ak yon to reyisit 91,90 %, kote 62 319 kandida admis sou 67 811 patisipan.
Nòdès rive nan 91,73 %, ak 7 410 admis sou 8 078 kandida, pandan Sid anrejistre 91,45 %, ak 11 806 admis sou 12 910 patisipan.
Pou lòt depatman yo, Sant gen yon to reyisit 86,24 %, Grandans 85,99 %, Sidès 80,34 %, epi Nip 75,50 %.
Konsènan rezilta Bakaloreya, depatman Lwès la konte 18 746 kandida admis sou 40 996 patisipan, sa ki reprezante yon to reyisit 45,73 %. Nan Nip, to reyisit la rive 40,36 %.
Nan Lekòl Nòmal Enstititè ak Jadinye Timoun (ENIJE), 1 759 kandida sou 2 510 reyisi egzamen yo, sa ki bay yon to reyisit 70,08 %.
MENFP presize rezilta 9yèm AF pou depatman Latibonit ak Nòdwès, ansanm ak rezilta Bakaloreya pou lòt depatman yo, ap pibliye nan jou k ap vini yo.
Ministè a ajoute sètifika ak relevé nòt yo ap disponib nan Direksyon Depatmantal Edikasyon yo (DDE) nan fen mwa out la.