Nan yon nòt pou laprès ki rann piblik mèkredi 28 septanm nan, Biwo Pwoteksyon Sitwayen (OPC) pataje kolè ak endiyasyon li sou kondisyon prizonye yo nan divès prizon nan peyi a epi mande paran prizonye ki mouri yo pou rele Leta ayisyen devan entans jidisyè entènasyonal yo.
Selon OPC, prizon sivil Okay, Sen-Mak, Jeremi, Fò Libète, Jakmèl ak Peti Gwav nan yon sitiyasyon difisil paske prizonye yo manke jwenn manje depi plizyè semèn. Sitiyasyon sila pa diferan nan divès lòt prizon nan peyi a.
OPC kontinye pou eksplike : sòti 23 dawout pou rive 27 septanm 2022, plis pase 12 prizonye mouri. Selon obsèvatè nasyonal ak entènasyonal yo, malnitrisyon ak absans swen medikal adekwa se kòz prensipal lanmò ayisyen sila yo ki deyè 4 miray .
OPC fè konnen 3 dènye ka ki anrejistre nan komisarya peti Gwav la, kote imaj yo vin viral sou rezo sosyal yo pèmèt yo tabli epi evoke gwo vyolasyon dwa moun, sitou dwa ak lavi, dwa ak lasante ak lamanchay elatriye.
Ofis pwoteksyon sitwayen an rekòmande pou ke gen mezi ki pran dekonsè ak patnè entènasyonal yo notamman sila yo kap travay nan domèn imanitè pou yo ka limite dega yo, pandan y ap tann refòm estriktirèl nan prizon ki sou tè papa Desalin nan.
OPC lanse apèl bay otorite konsène yo pou yo pa kite sitiyasyon an vin pi mal jiska menen yon katastwòf imanitè. Nòt sila siyen pa Pwotektè sitwayen an, Renan HEDOUVILLE
Joseph Cenes Centre à la Une .
