Aprè divès lòt akò ki siyen deja, Pati Pitit Dessalines prezante yon lòt altènativ
Nan yon konferans pou laprès li bay dimanch 23 oktòb 2022 a, Sekretè Jeneral Pati politik Pitit Desalin nan, Moïse Jean Charles, mete deyò lis non ak tout misyon ansanm aktè yo te anonse ki pral fè pati Konsèy Tranzisyon Pèp Souveren an (KTPS), pou ranplase gouvènman PM Ariel Henry a.
Manda yo genyen se:
• Nome yon Premye Minis jan lalwa mande sa
• Konplete rapidman manm Lakou Kasasyon an, nome 9 manm Konsèy Elektoral Pwovizwa a pou òganizasyon eleksyon yo
• Mete estabilite nan peyi a epi sekirize li, amelyore konsantrasyon vi sosyo-ekonomik pèp Ayisyen an
• Regade mezi frè transfè $1,50 lan
• Regade mezi pou ede pèp la nan gaz la
• Ogmante valè goud la parapò ak dola a
• Pran mezi pou remèt pèp la kòb transfè yo an dola nan plas goud la.
Pwofil 9 manm yo varye, yo se :
Istoryen, Ekonomis, Sosyològ, Agwonòm, Espesyalis nan syans devlopman, Espesyalis nan finans piblik, Dwayen, Rektè, Pwofesè, Avoka.
Men lis 9 manm yo ak sektè oubyen depatman yo reprezante:
- Dr. Eugénia Romain, Prezidant : Reprezantan Lwès
- M. Edgard Leblanc, Vis Prezidan : Reprezantan Sektè politik
- M. Jacques Céus Joseph : Reprezantan Gran Nò
- M. Val Jean Elly : Reprezantan Gran Sid
- M. Jacques Woubins Bordenave : Reprezantan Latibonit/ Plato Santral
- M. Péguy Jean : Reprezantan Laprès
- M. Jerry Moncoeur: Reprezantan Dyaspora a
- M. Jean Renald Nau Léonard : Reprezantan Ouvriye/ Sendika peyizan
- M. Jérémie Dupont : Reprezantan Katye Popilè
Tout 9 komisè sa yo gen misyon pou redrese sitiyasyon sosyo-ekonomik peyi a epi mete kanpe tout dispozisyon pou gen eleksyon. Dire manda yo se (1) lane, l ap kòmanse jou yo enstale a. Yo p ap genyen yon salè, y ap gen frè fonksyònman epi y ap syeje nan palè nasyonal.
Sérondier Louisia, Centre à la UNE