Depi lane 1983, dat 28 oktòb la se jounen ki chwazi kòm jounen entènasyonal lang ak kilti kreyòl se yon jounen ki mete alonè lang kreyòl la ki dayè yo pale nan plizyè peyi tankou: Ayiti, Sirinam, Gwadloup elatriye kote genyen plis pase 12 milyon moun ki pale li nan mond lan.
Ane sila AKA kise akademi Kreyòl Ayisyen deside selebre jou sa sou tèm: «Lang Kreyòl ayisyen an nan lasyans, wi nou ap vanse !»
Anpil jefò pa sispan fèt nan AKA pou stritire lang kreyòl ayisyen an Mesaj sila a, ki pote siyati prezidan AKA a pwofesè Rogéda Dorcé Dorcil, mete aksan sou bèl efò ki dwe kontinye fèt pou devlope yon literati syantifik fètefouni nan lang kreyòl. Soti nan redaksyon memwa inivèsite pou tonbe nan pwodiksyon atik ak bon jan liv (syantifik) an kreyòl, prezidan an kwè chak Ayisyen, suivan domèn syantifik l ap evolye, genyen nòt pa l pou li jwe sou patisyon konbit natif natal ki dwe pèmèt lang lan layite, feraye, bay kalinda an gran jan nan lasyans. La a, nou envite w li tout mesaj AKA a kote ou pwal dekouvri sètènman plis sou lòt aspè ak lòt koze enstitisyon an manyen nan kad lansman selebrasyon 39èm Jounen entènasyonal lang ak kilti kreyòl yo nan lemond (28 oktòb)
Ayiti ki se pi gwo kominote kreyolofòn nan mond lan ap selebre 39 lane jounen entènasyonal lang ak kilti kreyòl, pale kreyòl, manje kreyòl menm jan chantè Chango Bastia ta ka di an fèl an kreyòl.
Joseph Samuel Guillaume, Centre à la UNE