Endividi moun pa rive idantifye tiye pandan jounen vandredi 15 Desanm 2023 a pou pipiti 2 moun nan vil Gonayiv (chèf lye depatman latibonit).
Youn nan viktim yo Jackson Pierre yon teknisyen entènasyonal nan domèn mekanik mouri nan Blòk Gatwo aprè l te fin resevwa plizyè katouch.
Jackson Pierre se pwofesè nan Lekòl Pwofesyonèl «United Technicians (UT)» ki sou wout Nasyonal nimewo 1 zòn Gatwo 21.
Direktè UT a, Durelus Bernave, fè konnen asasina Mèt Jackson Pierre se koudi pou lekòl la.
Jackson Pierre mouri kite madanm ak plizyè adolesan.
Lòt viktim nan jwenn lanmòl nan zòn Byenac.
Depi kèk jou, moun nan popilasyon sivil la ap atire atansyon otorite polisyè ak jidisyè sou zak asasinay ki gen tandans ap moute nan plizyè katye nan site lendepandans lan.
Semèn pase a yon chofè taksi moto mouri ak bal nan blòk K-jòj.
Malgre apèl ki lanse nan radyo, reponsab yo pajanm pran kras dispozisyon pou pèmèt fen ane pase nan lapè nan vil Gonayiv.
Pilwen bandi savyen kontinye operasyon san kanpe yo lanse nan lokalite Mowopèy sou Wout Nasyonal #1 an.
Nan yon atak yo fè vandredi aprè midi a sou yon veyikil kap transpòte pasaje, gen 3 moun ki blese gravman grav.
Toujou nan menm zòn nan, bandi ak zam yo tiye 2 gran moun 80 ak 70 lane. Yo kidnape plis pase 10 moun epi pote ale tout sa yo jwenn sou wout yo.
Nan Lakwa Peris/Jwanis (premyè seksyon komin Lestè) bandi yo kontinye ap kidnape tout moun ki frekante zòn sa a.
Preske 4 mwa depi l enstale nan depatman an, Direktè polis la, Jean-Louis Paul Ménard, pa janm anonse kisa kap fèt pou demantle bandi ak zam kap teworize popilasyon an.
Sous: AAP