Selon pòt pawòl adjwen polis Ayiti a Lionel Lazarre, anviwon yon 30tèn bandi tonbe maten madi 19 novanm 2024 la nan kad yon afwontman ak lapolis, aprè fòs lòd yo te fin dekouvri bandi yo nan gwo machin bwat ki t ap tante antre Petyonvil. N ap siyale, popilasyon an kanpe ak lapolis.
Gwo kout zam kontinye fè mikalaw, jodi madi 19 novanm nan nan lakou Pòtoprens, kote lapolis ap toke kòn li ak gwoup nèg ak zam ki ap teworize popilasyon an.
Tout aktivite paralize nan kapital la kote katouch ap chante depi lanwit lan pou rive jis maten an.
Yon sitiyason ki kreye laperèz lakay abitan yo.
Soti Tijo, pase Kanapevè, rive zòn lali, monte Boudon elatriye… lari a bloke akoz gwo kout zam ki pa sispann chante.
Pa gen sikilasyon machin. Lari a blanch. Pòt lekòl yo ret fèmen. Antrepriz yo pa fonksyone. Popilasyon an ret chita lakay yo.
Sa fè 2èm semèn depi aktivite yo kaba nan Pòtoprens akoz vyolans gang yo ki pwopaje nan plizyè teritwa epi fòse plizyè milye moun kouri kite katye lakay yo.
Lapolis plis popilasyon an ki ak manchèt nan men lanse yon operasyon chèche bandi ki gaye Boudon ak Petyonvil. N ap raple madi 19 nov lan, Lapolis kwaze yon kamyon ki t ap transpòte bandi pou monte Petyon vil, kote plizyè dizèn ladan yo deja mouri plizyè zam ak yon dwo-n sezi.
Nan sèlman 4 jou, plis pase 20 mil moun kouri nan Pòtoprens pou gang, selon dènye rapò Òganizasyon Entènasyonal pou Migrasyon (OIM).
N ap raple tout zag briganday sa yo ap rive pandan peyi an gen yon fòs miltinasyonal ki prezan sou teritwa l.
Sadrax ULYSSE, Centre à la UNE !