Regroupman Jounalis k ap defann dwa moun yo Ayiti (RJDH) nan yon nòt yo mete deyò Mèkredi 20 Novanm 2024 la, di yo pran nòt sou repò pou yon dat ki poko fikse odyans piblik aksyon an apèl divès enkilpe sou asasina jounalis Néhémie JOSEPH la ki te dwe dewoule mèkredi sa nan lakou dapèl Ench, kote jij yo bay pretèks yo pa ka deplase akoz rate gaz.
RJDH profite raple jij ki nan kou dapèl yo devwa fondamantal yo pou yo rann jistis ak moun ki merite sa. RJDH di l ap suiv ak anpil atansyon dosye saa pandan yo voye yon piga ak tout responsab ki rantre nan manèv dilatwa ou lòt aksyon ki vle sal pi plis kredibilite ki te deja frajilize nan kad dosye sila.
N ap raple jij Edwige Dorsainvil te rann òdònans li nan mwa mas 2024 kote li te enkilpe lis moun sa yo: Senatè Rony Celestin, aktyèl ajan egzekitif enterimè Lauchard LAGUERRE, Chandou Clerjeune, Elionel Casséus, Angelina Fabiola Cameau, Rosevald Douyon, Huguens Charles, ak Lenel. Daprè rapò sou dosye a, yo ta gen lyen ak asasina Néhémi Joseph, ki te fèt nan Mibalè 10 oktòb 2019.