Nan yon kominike pou laprès ki date 16 fevriye 2025 lan, Laprezidans esplike atak bandi yo sou baz Teleco a nan mòn Tranchan se yon zak lach ki pa dwe aksepte.
Laprezidans di tou li kondane ak fòs li atak sila a ki fèt kont sòlda « Forces Armées d’Haïti » (FADH) yo ki t ap siveye baz sa a.
Li pèsiste pou l di Leta p ap fè bak devan okenn menas ki kapab menase souverènte nasyonal la ak sekirite sitwayen yo.
Laprezidans fè konnen tou li koube l byen ba devan fanmi viktim Petit’homme Charles Benictor, yon sòlda FADH ki pèdi lavi l pandan atak sa a gang yo te fè dimanch 16 fevriye a nan maten.
N ap siyale, tousuit aprè yon polisye UTAG fin resevwa yon bal nan kou anba men bandi yo lendi 17 fevriye 2025 la pandan yon operasyon fòs lòd yo kontinye ap mennen nan komin Kenskòf, malerezman polisye a mouri malgre yo te gentan kouri ak li lopital.