Direksyon Santral Polis Jidisyè a (DCPJ) ap akselere ankèt li sou dosye 1 045 kilo kokayin ki te sezi nan depatman Nòdwès la, sou zile Latòti, 12 jiyè 2025.
Sezi sa rete, jiskaprezan, pi gwo operasyon kont trafik dwòg @pnh_officiel janm mennen nan peyi a.
Daprè enfòmasyon ki disponib, DCPJ deja voye yon rapò pasyèl bay komisè gouvènman Pòdepè a. Nan dokiman sa a, envestigatè yo mande pou yo jwenn yon delegasyon pouvwa pou yo ka tande lòt moun ki sispèk yo konsidere kòm aktè enpòtan nan trafik sa.
Depi 21 novanm 2025, rapò te rive jwenn Tribinal Premyè Enstans Pòdepè.
Se ajan BLTS ansanm ak UDMO ki te mennen yon gwo operasyon sa sou zile Latòti. Yo te sezi 1 045 kilo kokayin, yon chay ki gen yon valè plizyè dizèn milyon dola sou mache entènasyonal la.
Pandan operasyon sa, yon Bayameyen te mouri anba bal, 2 Jamayiken te nwaye nan lanmè.
Operasyon sa a vin make yon chanjman nan kapasite PNH pou frape gwo rezo trafik dwòg ki opere espesyalman nan zòn kotyè yo.
Selon sous yo, plizyè non deja site nan ankèt la, e gen lòt ki poko rann temwayaj yo. Se poutèt sa, DCPJ ap chèche jwenn otorizasyon legal pou tande nouvo temwen, konvoke aktè sispèk epi konsolide prèv yo pou avanse dosye a.
Dosye sa gen gwo enpak sou sekirite nasyonal la, paske trafik dwòg lye ak gang ak koripsyon, imaj PNH ki ap chèche ranfòse kapasite li nan lit kont krim òganize.
By Centre à la UNE
Centre à la UNE se yon miltimedya sou entènèt ki te fonde 9 jiyè 2020. Li espesyalize nan bay nouvèl nan lang kreyòl, yon angajman ki reflete vizyon fondatè yo pou fè enfòmasyon pi aksesib pou kominote kreyòlofòn yo. Medya a genyen yon misyon pou enfòme, sansibilize, epi angaje moun sou sijè enpòtan nan sosyete a. Miltimedya sa a prezante atik, analiz, ak editoryal sou diferan domèn tankou dwa moun, politik, ak sosyete. Chak jou, editoryal li yo adrese pwoblèm enpòtan, souvan ak referans ak sitasyon otè ki enspire refleksyon pwofon sou kondisyon jèn Ayisyen yo ak sitiyasyon sosyo-politik Ayiti. Kòm yon medya angaje, li gen yon apwòch edikatif epi li chache ankouraje konsyans ak refleksyon nan mitan lektè li yo. Jounal sa a se tou yon espas pou kreyativite kote li prevwa pou ajoute caricatures k ap ilistre nouvèl oswa evennman k ap pase yo. Centre à la UNE se yon referans pou moun ki vle rete enfòme nan lang yo pi byen konprann. Nouvèl nou yo kredib e verifye ak yon rezo jèn jounalis profesyonèl e konpetan. Ou ka kontakte nou nan: journalcentrealaune@gmail.com e +549 351 262 7841